Uncategorized

انت عايز إيه في حياتك ؟ أصعب سؤال !

أنا مثقف – كتير جدا من أصدقائي لما بتكلم معاهم وأسال السؤال ده بعد ما يتكلم كلام كتير جداا مش مرتب او حتي كلام مرتب جدا عن مشكلة معينة 
واسأله انت عايز ايه ؟
يقول مش عارف !
طيب السؤال ليك انت دلوقتي 
انت عايز ايه ؟ 
عايز ايه في حياتك ؟ عايز ايه يكون في شخصيتك ؟ عايز إيه تحققه ولسه محققتهوش ؟ بتحاول تحققه ؟؟ بتسعي فيه ؟
طيب ايه آمالك ؟ طموحاتك ؟ افكارك ؟ 

طيب بص براحة كده 
بيني وبينكم هي الطريقة صعبة شوية لكن هي مشكلة كبيرة بتواجه كل الشباب وحتي الكبار في ناس مش عارفة لحد دلوقتي هي عايزة ايه 
ممكن تكون في شغلانة مرموقة جدا ومعاها فلوس كتير جدا وبرده تايهة ومش عارفة هي بتصحي من النوم كل يوم عشان الشغل ليه ؟ وايه السبب في وجع القلب الى عايشينه ده 


بص 
ورقة وقلم واكتب معايا 

اولا 
عاوزك تكتب كل حاجة في حياتك انت بتحبها , 
حتي لو كانت تافهة يعني بتحب تاكل ايه بتحب تشرب ايه بتحب تنام ازاي 

تاني حاجة 

اكتب كل احلامك صغيرها وكبيرها ناس انت شايفهم ناجحين جداا وصلوا لحاجة انت عاوز توصلها عشان تحقق ذاتك 
استني اكتب أي حد ؟ اها اكتب أي حد لكن حدد الحاجة الى انت بتحبها وعاوز توصلها معاه 
مثلا 
ف حقوم حاطط تحت اسم بيل جيتس المعلومات عنه وان دي حاجة انا عاوز اوصل لها 

افضل اكتب عن كل حد في حياتك  حتي لو كان صحابي  او  داعية اسلامي او رجل دين او شخص انت تعرفه  او مدير عملك 
اي حد انت شايفه ناجح 

دلوقتي بقي 
اكتب عن الحاجات الى انت بتعرف تعملها 
بتعرف تكتب ع الكمبيوتر بتعرف ترسم بتعرف حتي تلون بتعرف تبرمج او حتي تتكلم مع الناس او حتي انت ليك قدرة على إقناع الناس 
او حتي مبتعملش حاجة في حياتك الا انك تقعد على النت — دي لها حل برده والنت له حاجات كتير انت ممكن تستفيد منها زي ان تشتغل تسويق او تتعلم كورسات 

عشان متوهش 
دلوقتي انت كتبت الحاجات الى بتحبها 
والحاجات الى انت بتحب تعملها 
والناس الى انت شايفهم ناجحين ونفسك توصل للحاجة الى عاوزينها 

طيب دلوقتي بقي هات قلم له اي لون تاني 
ومثلا انت عاوز توصل ل بيل جيتس مثلا يعني 

طيب بيل جيتس ده تفتكر بيعرف يعمل ايه ؟ 
اكيد بيعرف كمبيوتر وبيعرف يبرمج (طيب ما تتعلم كمبيوتر وشوية برمجة ) طيب مثلا انت نفسك تكون زي واحد داعية زي مصطفي حسني 
طيب الى بيكون من الدعاة ده ايه الشروط الي يكون واحد من الدعاة ؟
وهو دخل معهد دعاة وبقي من رجال الدين 
بغض النظر عن اختلافك مع مصطفي حسني او لا خليك في المضمون للكلام

المهم 
كده انت حددت هدف وبتحدد ازاي توصل له 
طيب في الورقة الى كتبتها خطط على الحاجات الى توصلك لهدفك 
عارف لعبة المتاهه ؟ وصل الخطوط ببعضها واوصل بيها للهدف 

خلي بالك 
في حاجة انت ممكن توصل لها اسمها تغير الاماني 
ودي بتيجي تبعا لنضجك الفكري والظروف الى حواليك 
بلنسبة للنضج الفكري ان افكارك كبرت مع كبر سنك وتجاربك في حياتك ودي حاجة كويسة

يعني وانت صغير اقصي احلامك انك تشتري عجلة 
دلوقتي لو حد قالك حجيبلك عجبلة ممكن ……. 🙂 

المهم بلنسبة للتغير في الظروف انت في ظروف حياتك ممكن تلاقي صعاب ومشاكل 
حاول تخلي حياتك والمشاكل الى فيها زي المتاهه 
هات قلم تاني وخطط المشاكل دي عشان توصلك لاهدافك 


طيب بلنسبة للناس الى تايهه ومش عارفة حاجة خالص انا ليه عايش كده واتقتلت من الروتين وكرهت الصحيان كل يوم 
بص مشكلتك في الحياة عدم الرضي وده بسبب حاجة من الاتنين انك شغال شغلانة سيئة فعلا  او سيئة في افكارك 
ف حاول على قد ما تقدر 
لائن الروتين اكتر حاجة متعبة (عشان تكسر الملل )تقسم وقتك جزئين 
الجزء الاول تشتغل فيه الشغلانة بتاعتك وتعيش حياتك عادي لائنك اكييييييد محتاج فلوس ده امر واقع وحقولك حتعمل بيهم ايه دلوقتي 
وغير انك محتاج للفلوس اكيد الشغلانة دي حتفيدك في حياتك 

طيب الجزء التاني من وقتك بعد ما تمشي بخطواتك الى قلتها فوق حتحدد الحاجة الى انت عاوز تعملها 
مثلا بتحب الرسم 
ايه المشكلة لما تاخد من الفلوس الى انت شغال بيها ف الجزء الاول من وقتك وتجيب ادوات للرسم ؟!
ولو عندك موهبة كبيرة ممكن تنميها 
او حتي تنزل ف الوقت التاني ده تروح دور أيتام او مستشفيات للاطفال المرضي بالسرطان 
جرب مش حتخسر 
إنزل مع جمعية رسالة 
جرب مش حتخسر  …………
اتمني الموضوع يعجبكم وفي إنتظار آرائكم سواء نكمل في الكتابة كده أو لا 

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق

تم إكتشاف مانع الاعلانات .. !

فضلا وليس آمرا إغلق مانع الاعلانات .. فـ العائد المادي الضئيل يساعد علي استمرار الموقع .. شكرا لتفهمك